| Fondo Galego |
 |
 |
|
|
|
| fondogalego.org info@igadi.org |
|
| Tel/Fax: 986 357 238 |
Sensibilización / Exposicións 
A Paz Cuestión de Fondo |
||||||||||||||||||||||||||||||
|
Exposición con viñetas nas que se afonda en temas como a pobreza, o racismo e a violencia.
A exposición consta de 16 láminas de 120x80 cm., a toda cor e en lona de 3 mm. de espesor. Para instalarse, as láminas desenrólanse e pendúranse de calquera parede.
As láminas, que presentan dous debuxos en cada un dos paneis, son obra de 28 autores procedentes de 16 países diferentes. En clave visual e, nalgúns casos verbal, as caricaturas móstrannos os prexuízos que operan acerca da idea de paz, do racismo, das diferenzas sociais ou da guerra. Verdades en miniatura que retratan a sociedade contemporánea é a proposta desta exposición colectiva internacional, que non só serve de repaso á realidade actual, senón tamén como punto de debate cargado de sátira e ironía para amosar a cruenta realidade. A pobreza é unha forma de inxustiza social, un xeito de violencia estrutural que nega as condicións mínimas de desenvolvemento humano e xera situacións de exclusión, racismo e violencia. A pobreza debuxa un mapa de continuos conflitos entre os seres humanos, o cal provoca un maior afastamento da posibilidade de convivir en paz. Así mesmo, a falta de oportunidades impide á sociedade medrar en condicións de dignidade, o que aumenta as diferenzas sociais e agudiza o abismo entre pobre e ricos. De aí se desprende que máis da cuarta parte da poboación mundial viva en situación de pobreza e que os países industrializados a sufran dun xeito insistente e en continuo crecemento. O Fondo Galego de Cooperación e Solidariedade entende que o desenvolvemento sostible non é posible nun contexto de pobreza, violencia e racismo. Por iso, con esta exposición quere contribuír a crear un clima de opinión favorable á promoción dunha nova orde económica internacional, sen excluídos nin perdedores.
Coa intención de que a exposición sexa o máis proveitosa posible, é importante que se acompañe de distintos actos culturais que poidan concienciar e sensibilizar ao público que a visite. As charlas e conferencias sobre o tema, así como outros eventos, tal como música, cine ou teatro poden servir de estímulo, non só para achegarse a estes paneis, senón tamén para coñecer esas realidades representadas nos paneis. Pode ser interesante preparar un acto de inauguración ou de clausura, presentando a iniciativa a todos os colectivos que habitualmente acoden a este tipo de eventos, e animando á participación en xeral. Do mesmo xeito, difundir os actos asociados á exposición, así como esta mesma, entre os medios de comunicación En función das posibilidades, pode contemplarse a presenza dalgún debuxante da zona ou dalgún dos debuxantes que participan na exposición, como Pepe Carreiro, Hortas, Carlos Silvar ou Xaquín Marín. Neste sentido, a Secretaría Técnica do Fondo pode facilitar os contactos que se precisen. Outras actividades: -Taller de contos e de músicas do mundo Os contos e a música, que serven como ponte entre culturas, pódense utilizar para desenvolver todo tipo de actividades divulgativas e de entretemento que propicien valores de tolerancia e respecto á diferenza. Neste sentido, pódense organizar xogos e talleres, así como actividades orientadas a sensibilizar e dar a coñecer culturas e realidades diferentes a través da musica, dos contos e dos xogos propios de distintos lugares do planeta. -Carreira popular contra o racismo Pódense organizar actos nos que participe toda a cidadanía, como unha carreira popular contra o racismo, encabezada por algún deportista coñecido do lugar. O deporte contribúe á socialización de todas as persoas, a través de valores como o respecto e as relacións persoais. Para completar este acto, poderíase terminar coa lectura dun manifesto a favor da convivencia das diferenzas. -Vídeo-fórum As películas son unha fonte de información importante, e por isto é interesante valerse delas para presentar outras realidades que, ás veces, poden estar moi alleas e distantes. A sesión pode estruturarse en tres partes: Como exemplo de proxección proponse a curtametraxe Binta e a grande idea, de Javier Fesser. Esta curta, que conta cunha proposta didáctica de educación para o desenvolvemento, defende o avance da humanidade dotando de saúde, educación, igualdade e protección a toda a infancia. A película conta a vida de Binta, unha rapaza de sete anos que “vive nunha preciosa aldea xunto ao río Casamance no sur do Senegal e vai á escola. Súa prima Soda non ten a mesma sorte. A ela non se lle permite aprender as cousas que ignora deste mundo. Binta admira a seu pai, un humilde pescador que, preocupado polo progreso da humanidade, está empeñado en levar a cabo ‘unha idea’ que se lle ocorreu.” -Charla de ONGDs sobre proxectos financiados polo Fondo As ONGDs que traballan directamente e cooperan co Fondo Galego están dispostas a explicar o seu traballo no campo da cooperación internacional. É importante amosar á cidadanía os proxectos que se executan, cal é a súa utilidade e que pensan as persoas beneficiadas deles, para así avanzar no reforzamento dunha conciencia máis solidaria atenta ás inxustizas e ás desigualdades.
Esta unidade didáctica, en formato de disco compacto, está orientada a proporcionar ferramentas de traballo que faciliten a achega ao concepto de paz, por medio duns coñecementos básicos que sirvan para entender que é a paz e a non violencia. A unidade didáctica está dirixida ao alumnado de educación secundaria e preséntase por medio de actividades con explicacións teóricas e prácticas que inducen ao debate. Na unidade didáctica inclúense as láminas da exposición así como preguntas que invitan á reflexión e a unha posta en común participativa. A última actividade é un test de avaliación, no que se debe responder Verdadeiro ou Falso, e que conta coas solucións, ao final, para a comprobación das respostas:
|
||||||||||||||||||||||||||||||
|
|
||||||||||||||||||||||||||||||
|
|
||||||||||||||||||||||||||||||
|
www.fondogalego.org
|
