Aviso:

[Pechar}


Illa de San Simón 2011-07-23

‘Contos coas mans abertas’ sensibilizará sobre a solidariedade internacional en 42 vilas galegas

- Arranca no Concello de Castrelo de Miño a xira 2011 do espectáculo ofertado polo Fondo Galego de Cooperación e Solidariedade ás Administracións socias
- A proposta da compañía A Tropa de Trapo, dirixida a público adolescente e adulto, inclúe música en directo con instrumentos de diferentes países

A Tropa de Trapo volve levar os 'Contos coas mans abertas' polas catro provincias galegasEsta fin de semana iníciase na vila ourensá de Castrelo de Miño a xira 2011 do espectáculo ‘Contos coas mans abertas’, promovida polo Fondo Galego de Cooperación e Solidariedade dentro das súas actividades de sensibilización. Tras a excelente acollida colleitada en 2010, a proposta músico-teatral creada pola compañía compostelá A Tropa de Trapo para a asociación de Concellos e Deputacións percorrerá este ano un total de 42 entidades socias. A primeira das representacións terá lugar no Centro de Día de Castrelo mañá domingo 24 de xullo ás 21 horas, con entrada de balde. O edificio emprazado no lugar de Vide acolle tamén estes días a exposición ‘A paz cuestión de fondo’.

O espectáculo ‘Contos coas mans abertas’, dirixido a público adolescente e adulto, baséase en pezas narradas a dúas voces onde a música en directo cobra especial relevancia. Instrumentos como a guitarra española ou o laúde árabe mergullan aos espectadores en historias reais, recollidas case todas en primeira persoa, contos sinceros e achegados que falan do fondo humano que nos une a todos. Sen caer en tópicos sobre a solidariedade e a cooperación, ‘Contos coas mans abertas’ é un espectáculo cheo de esperanza, de humor, de amor, de pequenas loitas e grandes soños. Son contos para mellorar o mundo e entendelo mellor.

Mulleres da aldea, cooperantes, guerrilleiros sandinistas, vacas, inmigrantes do Magreb ou unha tribo de bosquimanos son algúns dos protagonistas das historias contadas por Marta Ortiz e Brais Gutiérrez, dous ensinantes de vocación que en 2006 xuntaron as súa inquedanza pola narración oral no proxecto A Tropa de Trapo. Dende entón levan percorrido toda Galicia, e mesmo outras Comunidades Autónomas, facendo reflexionar a nenos, mozos e maiores cos seus diferentes espectáculos.