Aviso:

[Pechar}


Lousame 2016-05-31

Lousame e o Fondo Galego poñen en marcha os obradoiros 'Tecendo polo cambio'

- As clases de calceta impartiranse os luns de xuño de 16 a 18 horas e vanse combinar con debates sobre cooperación internacional ou igualdade de xénero.
- A actividade será de balde no local social do Cruído e elaborarase unha peza conxunta coa que se cubrirá algún elemento da rúa, nun acto de "yarn bombing".

O Fondo Galego apoiou con anterioridade a iniciativa Entretecendo da ONGD Intered.O Concello de Lousame vén de abrir o prazo de inscrición para os obradoiros 'Tecendo polo cambio' nos que, ademais de aprender a calcetar, se reflexionará sobre temas como a cooperación ou a equidade de xénero. Trátase dunha das actividades de sensibilización fronte as desigualdades ofertadas polo Fondo Galego de Cooperación e Solidariedade, entidade da que o municipio é socio. As clases terán lugar no local social do Cruído, os luns de xuño de 16 a 18 horas, e a inscrición, que é totalmente gratuíta, pode formalizarse no departamento de Servizos Sociais ao longo deste mes de maio ou no teléfono 981 820 494. Tamén se facilitarán de balde os materiais necesarios para tecer.

Os días 6, 13 e 20 de xuño levaranse a cabo as aulas de calceta, para as que non se necesitan coñecementos previos, impartidas pola tamén monitora de lanoterapia Socorro Vázquez, que acudirá acompañada por persoal do Fondo Galego e mesmo representantes de ONGD ou de países do Sur, que conversarán coas persoas asistentes. O obxectivo é achegar ao eido rural e a veciñanza de todas as idades a defensa dos Dereitos Humanos, ao tempo que se recoñece o traballo feminino a través dunha tarefa compartida por mulleres de todos os tempos e culturas.

As e os participantes tecerán unha peza conxunta coa que o 27 de xuño se cubrirá algún elemento da rúa, nunha acción reivindicativa de "yarn bombing" ou "urban knitting", unha técnica de arte urbana coa que apropiarse do espazo público, relacionando o individual co colectivo e rompendo a dicotomía público/privado. 'Tecendo polo cambio' encádrase no Plan de activades 2016 do Fondo Galego de Cooperación e Solidariedade, cofinanciado pola Xunta de Galicia. Os obradoiros de calceta levaranse a cabo este ano en tres concellos socios, dos que Lousame será o primeiro en estrealos.