O Fondo Galego propón Ciclos de Cine con Fondo para concienciar sobre as desigualdades

O Fondo Galego de Cooperación e Solidariedade ten a disposición dos socios o VideoFondo, unha colección de 69 películas e documentais que resultan moi atractivas para dar a coñecer outras realidades e sensibilizar a cidadanía galega. Para tirarlle maior rendemento a este arquivo fílmico, proponse a actividade Ciclos de Cine con Fondo, co fin de concienciar sobre as desigualdades, favorecer unha visión crítica e solidaria e fomentar a interculturalidade.

Cada ciclo consta de varias películas que se agrupan en trece temáticas: migracións e interculturalidade, a loita das mulleres do Sur pola equidade, desigualdades de xénero, ecoloxismo, educación para o desenvolvemento, o colonialismo do continente americano, globalización capitalista e efectos colaterais, historia actual de América Latina, refuxiadas/os políticas/os, pobreza e desigualdades sociais, pacifismo e tolerancia, conflitos actuais e mais dereito á educación.

Tras o visionado de cada filme, realizaríase un debate. Propóñense asemade algunhas accións complementarias e recoméndase organizar canda o ciclo unha das exposicións que oferta o Fondo Galego ou ben unha conferencia con ongd expertas no tema. A formulación completa da actividade pode consultarse aquí.