Reunidos en Santiago de Compostela, a día 4 de novembro do 2005.

Dunha banda Alfredo Novoa Gil, presidente do Fondo Galego, e doutra Xoán Hermida, director da ONGD Amarante,

MANIFESTAN

Primeiro. Que ambas partes comparten a convicción de que as relacións comerciais teñen un peso importante no desenvolvemento das sociedades e, en consecuencia, os desequilibrios que marcan as dinámicas actuais do comercio internacional teñen unha repercusión negativa na vida dunha alta porcentaxe de labregas e labregos dos países do sur.

Segundo. Que o Comercio Xusto é unha forma de denunciar as prácticas inxustas que condicionan o comercio internacional, especialmente o de produtos agrícolas como o café; e tamén de sensibilizar á cidadanía da súa responsabilidade como consumidora.

Terceiro. Que dende o ámbito municipal pódense artellar compromisos para fomentar unha conciencia máis solidaria na dimensión do consumo e para alentar reivindicacións cívicas dun cambio nas regras que perpetúan a inxustiza e as desigualdades.

Cuarto. Que o Programa do Bo Café elaborado pola ONG Amarante contribúe á sensibilización da sociedade galega nesta problemática e recaba o concurso das administracións públicas para que se impliquen co Comercio Xusto introducindo os seus produtos nos seus espazos de consumo, a fin de servir de referente á cidadanía.

En consecuencia, ACORDAN:

1. O Fondo Galego impulsará o Programa do Bo Café da ONG Amarante para que as administracións municipais galegas utilicen café de comercio xusto nas súas máquinas de bebidas quentes e cafeterías.
2. O Fondo Galego comprométese a fomentar e/ou potenciar o comercio xusto en xeral, introducindo esta dimensión na súa axenda de sensibilización.
3. O Fondo Galego utilizará produtos de comercio xusto á hora de agasallar ás persoas participantes en congresos, seminarios... e recomendará ás administracións municipais que inclúan estes produtos nos seus regalos de empresa.
4. A ONG Amarante responsabilízase de certificar a autenticidades dos produtos de comercio xusto por medio dun selo acreditativo e de facer o seguimento gratuíto da súa comercialización dentro dos concellos.
5. A ONG Amarante comprométese a realizar sesións de sensibilización sobre comercio xusto e consumo responsable, así como a colaborar coas medios ao seu alcance na difusión desta iniciativa.
6. Ambas partes designarán a dúas persoas que se reunirán cada catro meses co propósito de analizar as accións desenvolvidas e avaliar a aplicación do presente Convenio.

En proba de conformidade no lugar e data arriba indicados, asinan a presente,

Alfredo Novoa Gil, presidente do Fondo Galego.

Xoán Hermida, director de Amarante.